چمن: پولیس فائرنگ سے شہری جاں بحق، لواحقین کا احتجاج مذاکرات کے بعد ختم

کو ئٹہ( بلو چستان خبر)چمن میں پولیس فائرنگ کے ایک واقعے میں عبدالباری عرف پہلوان جاں بحق جبکہ ایک شخص زخمی ہوگیا۔ پولیس کے مطابق واقعہ گزشتہ رات اس وقت پیش آیا جب موٹر سائیکل سوار دو افراد کو رکنے کا اشارہ کیا گیا، تاہم نہ رکنے پر مبینہ طور پر پولیس کی جانب سے فائرنگ کی گئی جس کے نتیجے میں ایک شخص موقع پر جاں بحق اور دوسرا زخمی ہوگیا۔دوسری جانب لواحقین نے مؤقف اختیار کیا ہے کہ عبدالباری ایک تاجر تھا اور بے گناہ تھا۔ اہل خانہ نے پولیس مؤقف کو مسترد کرتے ہوئے لاش کے ہمراہ ڈی سی آفس کے سامنے احتجاج کیا، جبکہ چمن اور قلعہ عبداللہ میں قومی شاہراہ بھی بند کر دی گئی۔بعد ازاں ضلعی انتظامیہ، سیاسی و قبائلی عمائدین اور لواحقین کے درمیان طویل مذاکرات ہوئے جن کے نتیجے میں معاہدہ طے پا گیا۔ معاہدے کے مطابق واقعے میں ملوث اہلکاروں کو معطل کر کے مقدمہ درج کیا جائے گا، پولیس کی جانب سے درج ایف آئی آر واپس لی جائے گی، مقتول کو شہید قرار دے کر معاوضہ دیا جائے گا اور واقعے کی شفاف تحقیقات کے لیے جوڈیشل کمیشن قائم کیا جائے گا۔معاہدے کے بعد لواحقین نے احتجاج ختم کر دیا، قومی شاہراہ کو ٹریفک کے لیے کھول دیا گیا اور لاش کو تدفین کے لیے آبائی قبرستان منتقل کر دیا گیا۔