ٹرمپ کا حیران کن فیصلہ: آبنائے ہرمز میں ’پروجیکٹ فریڈم‘ عارضی طور پر معطل، ایران سے معاہدے کی امید

واشنگٹن( مانیٹرنگ ڈیسک)امریکا کے صدر ڈونلڈ ٹرمپ نے آبنائے ہرمز میں جاری ’’پروجیکٹ فریڈم‘‘ کو عارضی طور پر روکنے کا اعلان کرتے ہوئے عالمی سطح پر سیاسی حلقوں کو حیرت میں مبتلا کر دیا ہے۔صدر ٹرمپ نے اپنے سوشل میڈیا پلیٹ فارم ’’ٹرتھ سوشل‘‘ پر بیان میں کہا کہ یہ فیصلہ مختلف ممالک، بشمول پاکستان کی درخواست اور ایران کے ساتھ جاری سفارتی پیش رفت کے بعد کیا گیا ہے۔ان کے مطابق ایران کے نمائندوں کے ساتھ ایک جامع اور حتمی معاہدے کی جانب اہم پیش رفت ہو رہی ہے، جس کے باعث خطے میں کشیدگی کم ہونے کی امید پیدا ہوئی ہے۔ٹرمپ نے واضح کیا کہ اگرچہ آبنائے ہرمز میں بعض حفاظتی پابندیاں برقرار رہیں گی، تاہم جہازوں کی حفاظت کے لیے شروع کیا گیا آپریشن وقتی طور پر معطل کیا جا رہا ہے تاکہ ممکنہ معاہدے کے نتائج کا جائزہ لیا جا سکے۔ماہرین کے مطابق یہ پیش رفت خطے میں جاری کشیدگی کے تناظر میں ایک اہم موڑ ثابت ہو سکتی ہے، تاہم حتمی معاہدے تک صورتحال غیر یقینی رہنے کا امکان ہے۔