بلوچستان قومی ترقی و استحکام کا بنیادی ستون ہے، پائیدار امن کے بغیر خوشحالی ممکن نہیں: صدر آصف زرداری

کو ئٹہ( بلو چستان خبر)صدرِ مملکت آصف علی زرداری سے پاکستان پیپلز پارٹی کے مرکزی رہنما میر شفیق الرحمن مینگل نے ملاقات کی، جس میں ملک کی مجموعی سیاسی صورتحال، قومی یکجہتی، بلوچستان میں امن و امان، تنظیمی امور اور این اے 256 کے ضمنی انتخاب سے متعلق تفصیلی تبادلہ خیال کیا گیا۔ملاقات کے دوران اس بات پر زور دیا گیا کہ پاکستان اس وقت داخلی استحکام، سیاسی بصیرت اور قومی ہم آہنگی کا متقاضی ہے۔ شرکاء نے اس امر پر اتفاق کیا کہ موجودہ نازک صورتحال میں تمام جمہوری اور وفاقی قوتوں پر یہ ذمہ داری عائد ہوتی ہے کہ وہ ذاتی اور گروہی مفادات سے بالاتر ہو کر ریاستی استحکام، آئینی بالادستی اور جمہوری تسلسل کے فروغ کے لیے اپنا کردار ادا کریں۔صدر آصف علی زرداری نے اس موقع پر بلوچستان کی صورتحال، وہاں درپیش چیلنجز اور عوامی مسائل کے حل کے لیے سیاسی مفاہمت اور مؤثر حکمت عملی کو ناگزیر قرار دیا۔ انہوں نے کہا کہ بلوچستان پاکستان کی نظریاتی اور جغرافیائی تکمیل کا بنیادی ستون ہے، اور وہاں پائیدار امن، ترقی اور سیاسی استحکام کے بغیر قومی خوشحالی کا خواب مکمل نہیں ہو سکتا۔ملاقات میں میر شفیق الرحمن مینگل نے بلوچستان کے مختلف اضلاع خصوصاً جھالاوان اور گردونواح کی مجموعی صورتحال، عوامی مسائل، قیام امن کی ضرورت، سیاسی کارکنوں کی سرگرمیوں اور پارٹی تنظیم سازی سے متعلق تفصیلی بریفنگ بھی دی۔ انہوں نے کہا کہ بلوچستان کے عوام اب انتشار، جبر اور نفرت کی سیاست کو مسترد کر چکے ہیں اور ترقی و استحکام چاہتے ہیں۔