ایران-امارات کشیدگی: حملوں کے الزامات اور سخت بیانات سے صورتحال مزید سنگین

تہران( مانیٹرنگ ڈیسک)متحدہ عرب امارات نے ایران پر میزائل اور ڈرون حملوں کا الزام عائد کیا ہے، تاہم ایرانی حکام نے ان دعوؤں کو سختی سے مسترد کرتے ہوئے انہیں بے بنیاد قرار دیا ہے۔غیر ملکی خبر رساں ادارے کے مطابق اماراتی حکام کا کہنا ہے کہ ان کے فضائی دفاعی نظام نے مبینہ حملوں کو ناکام بنایا، تاہم فجیرہ بندرگاہ کی ایک آئل تنصیب پر ڈرون گرنے سے آگ بھڑک اٹھی۔دوسری جانب ایران کی مسلح افواج کے کمانڈ سینٹر کے ترجمان ابراہیم ذوالفقاری نے واضح کیا ہے کہ ایران نے حالیہ دنوں میں متحدہ عرب امارات کے خلاف کوئی میزائل یا فضائی کارروائی نہیں کی۔ انہوں نے کہا کہ ایسے الزامات حقیقت سے عاری ہیں اور ایران کے خلاف منفی پروپیگنڈا مہم کا حصہ ہیں۔ایرانی ترجمان نے امارات کو خبردار کیا کہ وہ اپنی سرزمین کو کسی بھی ایسی سرگرمی کے لیے استعمال نہ ہونے دے جو ایران کے خلاف ہو، خصوصاً امریکی اور اسرائیلی افواج کی موجودگی کے تناظر میں۔ انہوں نے کہا کہ اگر اماراتی سرزمین ایران کے خلاف استعمال ہوئی تو اس کا سخت ردعمل دیا جائے گا۔ماہرین کے مطابق حالیہ بیانات اور الزامات نے خلیجی خطے میں پہلے سے موجود کشیدگی کو مزید بڑھا دیا ہے، جس کے اثرات علاقائی امن اور عالمی توانائی سپلائی پر بھی پڑ سکتے ہیں۔