پاکستان نے مئی کے لیے ایل این جی اسپاٹ خریداری کے ٹینڈر جاری کر دیے

 اسلام آباد( کامرس ڈیسک)پاکستان نے مئی کے لیے ایل این جی کی اسپاٹ خریداری کے ٹینڈر جاری کر دیے ہیں تاکہ ملکی توانائی ضروریات کو پورا کیا جا سکے۔پیٹرولیم ڈویژن کے ذرائع کے مطابق پاکستان ایل این جی لمیٹڈ نے دو ایل این جی کارگوز کے لیے عالمی کمپنیوں سے بولیاں طلب کی ہیں۔ عالمی کمپنیاں 7 مئی تک اپنی بڈز جمع کرا سکیں گی، جبکہ اسی روز یہ بڈز کھولی جائیں گی۔ذرائع کے مطابق مئی کے لیے پہلے ایل این جی کارگو کی سپلائی 12 سے 14 مئی کے درمیان متوقع ہے، جبکہ دوسرے کارگو کی سپلائی 24 سے 26 مئی کے دوران شیڈول کی گئی ہے۔توانائی کے شعبے کے ماہرین کے مطابق اسپاٹ خریداری کے ذریعے فوری ضروریات پوری کرنے میں مدد ملتی ہے، تاہم اس کی قیمت طویل مدتی معاہدوں کے مقابلے میں زیادہ ہوتی ہے۔