ای سی سی کی اہم منظوری: وزیراعظم ہاؤسنگ پروگرام میں توسیع

 اسلام آباد( کامرس ڈیسک)اقتصادی رابطہ کمیٹی (ای سی سی) نے وزیراعظم ہاؤسنگ پروگرام میں توسیع، ملک بھر کی ڈسٹری بیوشن کمپنیوں (ڈسکوز) اور کے-الیکٹرک کے لیے یکساں سسٹم چارجز کے نفاذ سمیت متعدد اہم منصوبوں کی منظوری دے دی ہے۔وزارت خزانہ کے مطابق وفاقی وزیر خزانہ محمد اورنگزیب کی زیر صدارت ہونے والے اجلاس میں مختلف ترقیاتی اور انتظامی امور کا تفصیلی جائزہ لیا گیا۔اجلاس میں فیصلہ کیا گیا کہ نظرثانی شدہ فریم ورک میں اوورسیز پاکستانیوں اور نجی شعبے کو بھی شامل کیا جائے گا تاکہ ہاؤسنگ سیکٹر میں سرمایہ کاری کے مواقع بڑھائے جا سکیں۔مزید برآں، نیشنل اسٹیل کمپلیکس لمیٹڈ کی بحالی کے لیے گیس کی فراہمی کی منظوری دی گئی، تاہم اس کی بحالی کو ٹیرف اور گیس کی دستیابی سے مشروط رکھا گیا ہے۔کمیٹی نے پاکستان ایکسلیریٹڈ وہیکل الیکٹریفکیشن پروگرام کے دوسرے مرحلے کے آغاز کی بھی منظوری دی، جس کے تحت ملک میں الیکٹرک گاڑیوں کے فروغ اور رسائی میں بہتری لائی جائے گی۔اسی اجلاس میں ملک بھر کی تمام ڈسکوز اور کے-الیکٹرک کے لیے یکساں سسٹم چارجز نافذ کرنے کا فیصلہ کیا گیا تاکہ بجلی کے نظام میں ہم آہنگی پیدا کی جا سکے۔وزارت خزانہ کے مطابق پاسپورٹ اینڈ امیگریشن ڈیپارٹمنٹ کے لیے 2.5 ارب روپے کی تکنیکی سپلیمنٹری گرانٹ بھی منظور کی گئی ہے، جو تنخواہوں، واجبات اور آپریشنل ضروریات پر خرچ کی جائے گی۔اجلاس میں اسلام آباد دانش اسکول کے لیے 35 کروڑ روپے، نارووال میں فیض احمد فیض کمپلیکس کی تعمیر کے لیے 10 کروڑ روپے جبکہ جشن آزادی اور معرکہ حق کی تقریبات کے لیے 5 کروڑ 96 لاکھ روپے کی منظوری بھی دی گئی۔