ترکیے کا پہلا بین البراعظمی میزائل ’یلدرم حان‘ متعارف، دفاعی صلاحیت میں بڑا اضافہ

انقرہ( مانیٹرنگ ڈیسک)ترکیے نے دفاعی میدان میں اہم پیش رفت کرتے ہوئے اپنا پہلا بین البراعظمی بیلسٹک میزائل ’’یلدرم حان‘‘ متعارف کرا دیا ہے، جسے استنبول میں جاری دفاعی نمائش کے دوران پیش کیا گیا۔ترک میڈیا کے مطابق یہ جدید میزائل وزارت دفاع کے ریسرچ اینڈ ڈیولپمنٹ سینٹر کی تیار کردہ ٹیکنالوجی کا نتیجہ ہے، جس میں جدید ترین دفاعی خصوصیات شامل کی گئی ہیں۔حکام کا کہنا ہے کہ ’’یلدرم حان‘‘ میزائل آواز کی رفتار سے تقریباً 25 گنا زیادہ تیز رفتاری حاصل کرنے کی صلاحیت رکھتا ہے اور 6 ہزار کلومیٹر تک ہدف کو نشانہ بنا سکتا ہے، جو اسے طویل فاصلے تک مار کرنے والے جدید ہتھیاروں میں شامل کرتا ہے۔رپورٹس کے مطابق میزائل میں مائع نائٹروجن ٹیٹرا آکسائیڈ کو بطور ایندھن استعمال کیا گیا ہے اور اسے چار طاقتور راکٹ انجنز سے لیس کیا گیا ہے، جس سے اس کی کارکردگی اور مارک صلاحیت میں نمایاں اضافہ ہوا ہے۔ماہرین کے مطابق اس میزائل کی رونمائی ایسے وقت میں کی گئی ہے جب ترکیے دفاعی صنعت کو مضبوط بنانے کے لیے میزائل ٹیکنالوجی، ڈرونز، فضائی دفاع اور خلائی شعبوں میں وسیع سرمایہ کاری کر رہا ہے، جس کے اثرات خطے میں طاقت کے توازن پر بھی مرتب ہو سکتے ہیں۔