مولانا فضل الرحمان کا مولانا ادریس کی شہادت پر اظہار افسوس، قاتلوں کی فوری گرفتاری کا مطالبہ

پشاور( بلو چستان خبر)جمعیت علمائے اسلام (ف) کے سربراہ مولانا فضل الرحمان نے شیخ الحدیث، سابق ایم پی اے اور جے یو آئی مرکزی شوریٰ کے رکن مولانا ادریس کی شہادت پر گہرے دکھ اور افسوس کا اظہار کیا ہے۔اپنے بیان میں مولانا فضل الرحمان نے کہا کہ مولانا ادریس کی شہادت کی خبر سے دل شدید رنجیدہ ہے۔ ان کے مطابق مولانا ادریس نے اپنی پوری زندگی اسلام اور پاکستان کی خدمت اور دفاع میں گزاری۔انہوں نے کہا کہ ایک سفید ریش عالم دین کی شہادت قرآن و سنت اور پاکستان کی بات کرنے والوں پر حملہ ہے۔ ان کا کہنا تھا کہ علماء کرام ہمیشہ معاشرے کے نظریاتی محافظ رہے ہیں، تاہم ان کی حفاظت کے لیے مؤثر اقدامات نہیں کیے جا رہے۔مولانا فضل الرحمان نے مزید کہا کہ مولانا ادریس ایک بلند پایہ عالم، مدبر سیاستدان اور صاحبِ رائے شخصیت تھے جنہوں نے ہمیشہ امن اور دلیل کی سیاست کو ترجیح دی۔انہوں نے کہا کہ مولانا ادریس کی پوری زندگی دینی خدمات میں گزری اور ان کا علم و کردار آنے والی نسلوں کے لیے مشعل راہ ہے۔جے یو آئی سربراہ نے مطالبہ کیا کہ واقعے میں ملوث عناصر کو فوری طور پر گرفتار کر کے قرار واقعی سزا دی جائے، کیونکہ ملک میں بڑھتی ہوئی لاقانونیت اور بدامنی تشویشناک ہے۔