جنوبی وزیرستان میں فوجی چوکی پر خودکش حملہ ناکام، 7 شہری زخمی

پشاور( بلو چستان خبر)جنوبی وزیرستان کے علاقے وانا کے قریب اعظم ورسک میں پاک فوج کی چوکی پر دہشت گردوں کی جانب سے کیا گیا خودکش حملہ سیکیورٹی فورسز کی بروقت کارروائی کے باعث ناکام بنا دیا گیا۔اطلاعات کے مطابق حملہ آور بارود سے بھری گاڑی کے ذریعے چیک پوسٹ کو نشانہ بنانے کی کوشش کر رہا تھا، تاہم پاک فوج کے ہائی الرٹ دستے نے فوری کارروائی کرتے ہوئے گاڑی کو ہدف تک پہنچنے سے پہلے ہی تباہ کر دیا۔حکام کے مطابق دھماکے کے نتیجے میں خودکش حملہ آور موقع پر ہلاک ہوگیا جبکہ بڑے جانی نقصان سے بچاؤ ممکن ہوا۔ تاہم واقعے میں 7 شہری زخمی ہوئے جنہیں ڈی ایچ کیو اسپتال وانا منتقل کر دیا گیا ہے۔ڈی ایچ کیو اسپتال کے ایم ایس ڈاکٹر جان محمد کے مطابق زخمی شہریوں کو فوری طبی امداد فراہم کی جا رہی ہے۔سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے تاکہ کسی بھی ممکنہ خطرے کا خاتمہ کیا جا سکے۔