ٹرمپ کی ذہنی صلاحیت پر 59 فیصد امریکیوں کو تحفظات، تازہ سروے میں اہم انکشاف

واشنگٹن( مانیٹرنگ ڈیسک)امریکا میں صدر ڈونلڈ ٹرمپ سے متعلق ایک تازہ عوامی سروے نے سیاسی حلقوں میں نئی بحث کو جنم دے دیا ہے۔واشنگٹن پوسٹ اور ایپسوس کے مشترکہ جائزے کے مطابق 59 فیصد امریکی شہریوں نے رائے دی ہے کہ صدر ٹرمپ کی ذہنی صلاحیت ملک کی قیادت کے تقاضوں پر پوری نہیں اترتی۔سروے رپورٹ میں یہ بھی سامنے آیا ہے کہ عوام کی ایک بڑی تعداد صدر کی فیصلہ سازی، ردعمل اور مجموعی کارکردگی سے غیر مطمئن ہے، جبکہ ان کی مقبولیت میں کمی کا رجحان بھی برقرار ہے۔ماہرین کے مطابق اس نوعیت کے سروے نتائج نہ صرف موجودہ سیاسی فضا پر اثر انداز ہو سکتے ہیں بلکہ آئندہ انتخابی حکمت عملی اور عوامی بیانیے کو بھی متاثر کرنے کا امکان رکھتے ہیں، خصوصاً ایسے وقت میں جب امریکی سیاست پہلے ہی شدید تقسیم کا شکار ہے۔