بلوچستان: سرکاری دفاتر میں حاضری کی نگرانی کے لیے خصوصی پولیس کو اختیار دینے کا فیصلہ

کوئٹہ( بلو چستان خبر) حکومت بلوچستان نے سرکاری محکموں میں نظم و ضبط بہتر بنانے اور غیر حاضری کے مسئلے پر قابو پانے کے لیے ایک اہم فیصلہ کرتے ہوئے اسپیشل برانچ پولیس کو تمام سول سرکاری محکموں کی حاضری کی نگرانی کا اختیار دینے کا اصولی فیصلہ کر لیا ہے۔ذرائع کے مطابق اس فیصلے کے تحت صحت، تعلیم، بی اینڈ آر، میونسپل کارپوریشن، پبلک ہیلتھ انجینئرنگ، آبپاشی، فشریز، زراعت سمیت دیگر تمام سول محکمے اس نگرانی کے دائرہ کار میں شامل ہوں گے۔حکومتی ذرائع کا کہنا ہے کہ اس اقدام کا مقصد دفاتر میں بڑھتی ہوئی غیر حاضری، سستی اور ناقص کارکردگی کو کنٹرول کرنا ہے تاکہ عوام کو بہتر اور بروقت خدمات فراہم کی جا سکیں۔طے شدہ منصوبے کے مطابق اسپیشل برانچ کے اہلکار روزانہ کی بنیاد پر مختلف دفاتر اور فیلڈ یونٹس کا دورہ کریں گے اور افسران و عملے کی حاضری کی جانچ کریں گے۔ اس عمل میں اعلیٰ افسران سے لے کر نچلے درجے کے ملازمین تک سب شامل ہوں گے۔مزید بتایا گیا ہے کہ اسپیشل برانچ روزانہ کی بنیاد پر ایک جامع رپورٹ تیار کرے گی جس میں حاضری، غیر حاضری، تاخیر سے آنے والے ملازمین اور مجموعی کارکردگی کی تفصیلات شامل ہوں گی۔ یہ رپورٹ براہ راست وزیراعلیٰ بلوچستان کو پیش کی جائے گی۔حکومت کے مطابق اس فیصلے سے سرکاری دفاتر میں حاضری کے نظام میں بہتری آئے گی اور خصوصاً صحت اور تعلیم جیسے اہم شعبوں میں عوامی خدمات کی فراہمی میں نمایاں بہتری متوقع ہے۔