بھکر میں گرین پاکستان انیشیٹو کے تحت بنجر زمین جدید زرعی مرکز میں تبدیل

بھکر( بلو چستان خبر) گرین پاکستان انیشیٹو کے تحت بھکر میں بنجر اور ریتلے رقبے کو جدید زرعی اور برآمدی مرکز میں تبدیل کر دیا گیا ہے۔منصوبے کے تحت زرعی شعبے میں جدت، برآمدات میں اضافہ اور خود کفالت کی جانب پیش رفت جاری ہے۔ سی ای او پینٹیرا لمیٹڈ فرقان علی اختر کے مطابق 1800 ایکڑ پر مشتمل جدید زرعی فارم صرف 60 دن میں تیار کیا گیا جو ایک ریکارڈ پیش رفت ہے۔ان کے مطابق فارم میں 13 سینٹرل پیوٹ سسٹمز اور 2.4 میگاواٹ ہائبرڈ سولر سسٹم کے ذریعے آبپاشی کا نظام قائم کیا گیا ہے۔چیف آپریٹنگ آفیسر پینٹیرا فارمز فاروق سعید نے بتایا کہ یہ زمین چند ماہ قبل 20 سے 50 فٹ بلند ریت کے ٹیلوں پر مشتمل تھی جسے مختصر وقت میں قابلِ کاشت بنا دیا گیا۔ان کے مطابق مجموعی رقبے میں سے 1300 ایکڑ پر گندم اور روڈز گراس کاشت کی جا رہی ہے، جبکہ روڈز گراس کی برآمد بھی جاری ہے۔حکام کے مطابق گرین پاکستان انیشیٹو کی معاونت، انفرا اسٹرکچر سپورٹ اور مسائل کے بروقت حل کے بغیر اس منصوبے کا آغاز ممکن نہیں تھا۔ گرین ایگری مال کے ذریعے معیاری بیج، کھاد اور زرعی سہولیات کی شفاف فراہمی بھی یقینی بنائی جا رہی ہے۔منتظمین کے مطابق چینی کمپنیوں کے اشتراک سے پاکستان میں ہائبرڈ بیج متعارف کرائے گئے ہیں جو زرعی پیداوار میں اضافہ کا باعث بن رہے ہیں۔