بلوچستان کی جامعات کے لیے 76 کروڑ روپے سے زائد فنڈز جاری

کوئٹہ( بلو چستان خبر)حکومت بلوچستان نے سرکاری جامعات کے اساتذہ، ملازمین کی تنخواہوں اور پنشن کی ادائیگی کے لیے 76 کروڑ 94 لاکھ روپے سے زائد فنڈز جاری کر دیے ہیں۔محکمہ خزانہ کے مطابق اپریل اور مئی 2026 کی تنخواہوں اور پنشن کی ادائیگی کے لیے مجموعی طور پر 769,479,937 روپے جاری کیے گئے ہیں، جو صوبے کی مختلف پبلک سیکٹر جامعات اور ان کے سب کیمپسز کو فراہم کیے جائیں گے۔دستاویزات کے مطابق جامعہ بلوچستان کے لیے تقریباً 24 کروڑ 96 لاکھ روپے، بیوٹمز کے لیے 13 کروڑ 93 لاکھ روپے، سردار بہادر خان وومن یونیورسٹی کے لیے 12 کروڑ 71 لاکھ روپے جبکہ لسبیلہ یونیورسٹی آف ایگریکلچر، واٹر اینڈ میرین سائنسز کے لیے 6 کروڑ 96 لاکھ روپے سے زائد فنڈز مختص کیے گئے ہیں۔اسی طرح یونیورسٹی آف تربت، لورالائی، میر چاکر خان رند یونیورسٹی سبی، گوادر، بولان یونیورسٹی آف ہیلتھ اینڈ میڈیکل سائنسز، یونیورسٹی آف مکران پنجگور اور دیگر تعلیمی اداروں کو بھی فنڈز فراہم کیے گئے ہیں۔محکمہ خزانہ نے ہدایت کی ہے کہ جاری کردہ فنڈز کی ادائیگی مالیاتی قواعد و ضوابط اور گرانٹ ان ایڈ رولز 2022 کے مطابق مکمل کی جائے، بصورت دیگر متعلقہ ادارے ذمہ دار ہوں گے۔