ایف بی آر کو رواں مالی سال کے پہلے 10 ماہ میں بڑا ریونیو شارٹ فال سامنے آگیا

اسلام آباد (کامرس ڈیسک) فیڈرل بورڈ آف ریونیو (ایف بی آر) رواں مالی سال 2025-26 کے پہلے 10 ماہ کے دوران محصولات کا ہدف حاصل کرنے میں ناکام رہا ہے اور عبوری ریونیو شارٹ فال 683 ارب روپے تک پہنچ گیا ہے۔ذرائع کے مطابق جولائی تا اپریل کے دوران ایف بی آر نے مجموعی طور پر 10 ہزار 263 ارب روپے جمع کیے، جبکہ نظرثانی شدہ ہدف 10 ہزار 946 ارب روپے مقرر تھا۔اس طرح اس عرصے میں 683 ارب روپے کا شارٹ فال ریکارڈ کیا گیا ہے، جبکہ اپریل 2026 میں بھی محصولات مقررہ ہدف سے کم رہے۔اعداد و شمار کے مطابق اپریل میں ایف بی آر نے 956 ارب روپے اکٹھے کیے، جبکہ ماہانہ ہدف 1,029 ارب روپے تھا، یوں اس ماہ 73 ارب روپے کی کمی ریکارڈ ہوئی۔تفصیلات کے مطابق اپریل میں انکم ٹیکس کی مد میں 446 ارب روپے، سیلز ٹیکس میں 320 ارب روپے، فیڈرل ایکسائز ڈیوٹی میں 65 ارب روپے جبکہ کسٹمز ڈیوٹی کی مد میں 125 ارب روپے وصول کیے گئے۔واضح رہے کہ حکومت نے مالی سال 2025-26 کے لیے پہلے ہی ٹیکس ہدف میں کمی کرتے ہوئے اسے 14 ہزار 307 ارب روپے سے کم کر کے 13 ہزار 979 ارب روپے مقرر کیا تھا، جس سے مجموعی ہدف میں 328 ارب روپے کی کمی کی گئی تھی۔