ایران کے ساتھ جاری جنگ 7 اپریل کو ہونے والی جنگ بندی کے بعد ختم ہو چکی : ٹرمپ

واشنگٹن( مانیٹرنگ ڈیسک) امریکی صدر ڈونلڈ ٹرمپ کی انتظامیہ نے کہا ہے کہ ایران کے ساتھ جاری جنگ 7 اپریل کو ہونے والی جنگ بندی کے بعد ختم ہو چکی ہے۔میڈیا رپورٹس کے مطابق انتظامیہ کا مؤقف ہے کہ اپریل کے آغاز میں نافذ ہونے والی جنگ بندی کے بعد سے ایران جنگ عملی طور پر ختم ہو گئی ہے۔اس سے قبل امریکی سینیٹ میں وزیر دفاع پیٹ ہیگستھ نے بھی بیان دیا تھا کہ جنگ بندی نے مؤثر طور پر لڑائی کو روک دیا ہے اور اب امریکی فوجی کارروائیاں 1973 کے قانون کے تحت کانگریس کی منظوری کی پابند نہیں رہیں۔انتظامیہ کے ایک سینئر اہلکار نے نام ظاہر نہ کرنے کی شرط پر بتایا کہ 28 فروری کو شروع ہونے والی جنگ ختم ہو چکی ہے اور 7 اپریل کے بعد سے امریکی فوج اور ایران کے درمیان کوئی براہِ راست جھڑپ نہیں ہوئی۔اہلکار کے مطابق دو ہفتے کی جنگ بندی کے بعد فریقین کے درمیان فائرنگ کا کوئی تبادلہ رپورٹ نہیں ہوا، جسے جنگ کے خاتمے کی علامت قرار دیا جا رہا ہے۔