پاکستان پیپلز پارٹی ہمیشہ مزدوروں کے حقوق کی علمبردار رہی ہے:حاجی میر علی

کوئٹہ( بلو چستان خبر)صوبائی وزیر و پاکستان پیپلز پارٹی کی ایگزیکٹو کمیٹی کے رکن حاجی میر علی مدد جتک نے یومِ مزدور کے موقع پر اپنے پیغام میں محنت کش طبقے کو خراجِ تحسین پیش کیا ہے۔انہوں نے کہا کہ مزدور کسی بھی معاشرے کی ترقی، خوشحالی اور استحکام میں ریڑھ کی ہڈی کی حیثیت رکھتے ہیں، اور یکم مئی ہمیں ان کی جدوجہد اور قربانیوں کی یاد دلاتا ہے۔حاجی میر علی مدد جتک کے مطابق پاکستان پیپلز پارٹی ہمیشہ مزدوروں کے حقوق کی علمبردار رہی ہے اور شہید ذوالفقار علی بھٹو اور شہید محترمہ بینظیر بھٹو نے اس طبقے کے لیے تاریخی اقدامات کیے۔انہوں نے کہا کہ موجودہ حکومت وزیراعلیٰ بلوچستان کی قیادت میں مزدوروں کی فلاح، بہتر اجرت، محفوظ ماحول اور سماجی تحفظ کے لیے عملی اقدامات کر رہی ہے۔صوبائی وزیر نے مزید کہا کہ بلوچستان کی ترقی میں مزدور طبقے کا کردار ناقابلِ فراموش ہے اور حکومت روزگار کے مواقع بڑھانے اور معیارِ زندگی بہتر بنانے کے لیے سنجیدہ اقدامات جاری رکھے ہوئے ہے۔انہوں نے اس عزم کا اظہار کیا کہ مزدوروں کے حقوق کے تحفظ اور انہیں باعزت مقام دلانے کے لیے ہر سطح پر کردار ادا کیا جائے گا۔