بلوچستان: لانگ روٹ بسوں میں ٹریکرز کی تنصیب لازمی، رفتار کی جدید مانیٹرنگ کا فیصلہ

کوئٹہ( بلو چستان خبر) محکمہ ٹرانسپورٹ بلوچستان نے لانگ روٹ بسوں میں ٹریکرز نصب کرنے کا فیصلہ کرتے ہوئے شاہراہوں پر حادثات کی روک تھام کے لیے جدید مانیٹرنگ نظام متعارف کرانے کا اعلان کیا ہے۔محکمہ ٹرانسپورٹ کے مطابق نیشنل ہائی ویز این 25، این 50، این 65، این 70 اور این 40 پر چلنے والی تمام بسوں میں ٹریکرز کی تنصیب لازمی قرار دی جائے گی۔ذرائع کے مطابق اس نظام کے ذریعے بسوں کی رفتار کی براہ راست نگرانی کی جائے گی جبکہ حد رفتار سے تجاوز کرنے پر کنٹرول روم کو فوری طور پر الرٹ موصول ہوگا۔محکمہ نے واضح کیا ہے کہ ٹریکر سرٹیفکیٹ کے بغیر کسی بھی بس کو روٹ پرمٹ جاری نہیں کیا جائے گا، جبکہ خلاف ورزی کی صورت میں جرمانے اور پابندیاں عائد کی جائیں گی۔حکام کے مطابق اوور اسپیڈنگ اور غیر ذمہ دارانہ ڈرائیونگ کے خلاف سخت کارروائی کی جائے گی تاکہ ٹریفک حادثات میں کمی لائی جا سکے۔محکمہ ٹرانسپورٹ کا کہنا ہے کہ اس ڈیجیٹل مانیٹرنگ سسٹم سے سفر کو محفوظ بنانے میں مدد ملے گی اور بلوچستان کے ٹرانسپورٹ نظام کو جدید خطوط پر استوار کیا جا رہا ہے۔