بنوں میں دہشت گردوں کا حملہ ناکام، پولیس کی بروقت کارروائی سے پسپائی

پشاور( بلو چستان خبر) خیبر پختونخوا پولیس کی بروقت اور مؤثر حکمت عملی کے باعث بنوں میں دہشت گردوں کا حملہ ناکام بنا دیا گیا۔پولیس کے مطابق رات تقریباً ڈیڑھ بجے دہشت گردوں کی بڑی تعداد نے چوکی مزنگہ پر حملہ کیا، تاہم سکیورٹی اہلکاروں نے فوری اور بھرپور جوابی کارروائی کرتے ہوئے حملے کو پسپا کر دیا۔ فجر تک جاری رہنے والے مقابلے میں دہشت گردوں کو بھاری نقصان اٹھانا پڑا۔واقعے کے بعد ڈی پی او بنوں یاسر آفریدی کی قیادت میں پولیس لائنز سے تازہ دم نفری موقع پر پہنچ گئی جبکہ دیگر سکیورٹی اداروں نے بھی علاقے کا کنٹرول سنبھال لیا۔مشترکہ سرچ آپریشن کے دوران علاقے سے خون کے نشانات اور دہشت گردوں کا چھوڑا گیا اسلحہ و سامان برآمد کیا گیا، جس میں بینڈولیئرز، سیڑھی اور جوتے شامل ہیں۔مقابلے کے دوران کانسٹیبل فریداللہ معمولی زخمی ہوئے، جنہیں فوری طبی امداد فراہم کی گئی۔آئی جی خیبر پختونخوا ذوالفقار حمید نے اہلکاروں کی بہادری کو سراہتے ہوئے کہا کہ دہشت گرد بزدلانہ کارروائیوں کے ذریعے شہریوں کو نشانہ بنانے کی کوشش کرتے ہیں لیکن ان کا انجام عبرت ناک ہوگا۔ڈی پی او بنوں نے کہا کہ پولیس دہشت گردی کے مکمل خاتمے کے لیے پرعزم ہے اور ہر حملے کا بھرپور جواب دیا جا رہا ہے۔