چین میں ہنگور کلاس آبدوز کی کمیشننگ، صدر آصف زرداری کی تقریب میں خصوصی شرکت

اسلام آباد( بلو چستان خبر)چین میں ہنگور کلاس آبدوز کی پہلی کمیشننگ کی تقریب منعقد ہوئی جس میں صدر آصف علی زرداری نے بطور مہمانِ خصوصی شرکت کی۔تفصیلات کے مطابق اس تقریب میں پاک بحریہ کے سربراہ ایڈمرل نوید اشرف سمیت دیگر اعلیٰ عسکری حکام بھی موجود تھے۔صدر آصف علی زرداری نے ہنگور کلاس آبدوز کی کمیشننگ کو پاک بحریہ کی جدید کاری کے سفر میں ایک تاریخی سنگ میل قرار دیتے ہوئے کہا کہ یہ پیش رفت پاکستان کے مضبوط، متوازن اور قابل اعتماد دفاعی نظام کے عزم کی عکاس ہے۔انہوں نے کہا کہ پاکستان اپنی خودمختاری کے تحفظ، سمندری مفادات کے دفاع اور معاشی سلامتی کو یقینی بنانے کی مکمل صلاحیت رکھتا ہے۔نیول چیف نے تقریب سے خطاب کرتے ہوئے کہا کہ اہم بحری راستوں پر بڑھتی ہوئی رکاوٹیں عالمی تجارت اور توانائی کے تحفظ کے لیے خطرہ بن رہی ہیں، جس کے لیے جدید اور ٹیکنالوجی سے لیس بحری افواج کی ضرورت مزید بڑھ گئی ہے۔انہوں نے کہا کہ ہنگور کلاس آبدوزیں جدید ہتھیاروں، سینسرز اور ایئر انڈیپنڈنٹ پروپلشن سسٹم سے لیس ہیں، جو خطے میں بحری استحکام اور دفاعی توازن برقرار رکھنے میں اہم کردار ادا کریں گی۔ یہ آبدوزیں سمندری راستوں اور اہم تجارتی لائنز آف کمیونیکیشن کے تحفظ میں بھی کلیدی حیثیت رکھتی ہیں۔