دبئی میں پراپرٹی ویزا قوانین میں نرمی، غیر ملکی سرمایہ کاروں کے لیے 2 سالہ ویزا مزید آسان بنا دیا گیا

دبئی( مانیٹرنگ ڈیسک) دبئی حکومت نے غیر ملکی سرمایہ کاروں کے لیے پراپرٹی ویزا قوانین میں اہم نرمی کا اعلان کرتے ہوئے جائیداد خریدنے پر 2 سالہ رہائشی ویزا حاصل کرنا مزید آسان بنا دیا ہے۔نئی پالیسی کے تحت اب سنگل مالک کے لیے مقررہ کم از کم قیمت کی شرط ختم کر دی گئی ہے، جس کے باعث زیادہ افراد اس سہولت سے فائدہ اٹھا سکیں گے۔حکام کے مطابق اب مشترکہ ملکیت کی صورت میں بھی رہائشی ویزا حاصل کیا جا سکتا ہے، تاہم ہر سرمایہ کار کا حصہ کم از کم 4 لاکھ درہم ہونا ضروری ہوگا۔ اس اقدام کا مقصد غیر ملکی سرمایہ کاری کو فروغ دینا اور رئیل اسٹیٹ مارکیٹ کو مزید فعال بنانا ہے۔مزید بتایا گیا ہے کہ 2 سالہ انویسٹر ویزا کو پہلے کے مقابلے میں زیادہ آسان اور قابل رسائی بنا دیا گیا ہے، جبکہ دیگر طویل مدتی ویزا اسکیموں کی شرائط برقرار رکھی گئی ہیں۔پانچ سالہ ریٹائرمنٹ ویزا کے لیے کم از کم 10 لاکھ درہم کی سرمایہ کاری اور عمر کی حد 55 سال مقرر ہے، جبکہ 10 سالہ گولڈن ویزا کے حصول کے لیے 20 لاکھ درہم کی سرمایہ کاری لازمی قرار دی گئی ہے۔گولڈن ویزا ہولڈرز کو فیملی اور گھریلو ملازمین کی اسپانسرشپ کی سہولت بھی حاصل ہوگی، اور وہ متحدہ عرب امارات سے باہر رہتے ہوئے بھی اپنا ویزا برقرار رکھ سکیں گے۔ماہرین کے مطابق اس نئی پالیسی سے دبئی کی رئیل اسٹیٹ مارکیٹ میں مزید تیزی آنے اور عالمی سرمایہ کاروں کی دلچسپی میں اضافہ متوقع ہے۔