گورنر بلوچستان سے مختلف سیا سی رہنمائو ں کی ملا قا تیں، علا قا ئی صور تحال پر تبادلہ خیال

کوئٹہ( بلو چستان خبر)گورنر بلوچستان جعفر خان مندوخیل نے کہا ہے کہ موجودہ علاقائی کشیدہ صورتحال میں سیاسی اور معاشی استحکام کے لیے منتخب عوامی نمائندوں اور سیاسی رہنماؤں پر اہم ذمہ داریاں عائد ہوتی ہیں، جنہیں سنجیدہ اور دلیرانہ فیصلوں کے ذریعے حالات بہتر بنانے چاہئیں۔گورنر ہاؤس کوئٹہ میں بلوچستان عوامی پارٹی کے مرکزی رہنما اور پارلیمانی سیکرٹری پرنس عمر احمدزئی سے گفتگو کرتے ہوئے انہوں نے کہا کہ سیاست محاذ آرائی نہیں بلکہ بامقصد مکالمے اور عوامی خدمت کا نام ہے، جس میں ذاتی رنجشوں یا مخالفت کو دشمنی میں بدلنے کی کوئی گنجائش نہیں۔اس موقع پر حاجی محمد خان لہڑی بھی موجود تھے۔گورنر بلوچستان نے کہا کہ انہوں نے ہمیشہ ایسی سیاست کو فروغ دیا ہے جو محبت، رواداری اور باہمی احترام پر مبنی ہو۔ ان کے مطابق مختلف اقوام، قبائل، مذہبی اور سیاسی رہنماؤں کے ساتھ تعلقات کو احترام کے ساتھ برقرار رکھنا ان کے لیے اعزاز کی بات ہے۔انہوں نے کہا کہ ان کی سیاست کا مقصد محروم طبقات کی بہتری اور عوامی فلاح کو آگے بڑھانا ہے، جبکہ انہوں نے تعلیم، صحت اور بنیادی ڈھانچے کے شعبوں میں متعدد ترقیاتی منصوبے مکمل کیے ہیں۔گورنر نے کہا کہ سیاسی قیادت کا کردار سماجی انصاف، معاشی مساوات اور مذہبی رواداری کے فروغ میں بنیادی حیثیت رکھتا ہے، جبکہ انہوں نے اپنی سیاسی زندگی میں کبھی انتقام یا ذاتی رنجش کو جگہ نہیں دی۔