چمن میں امن و امان تسلی بخش اور مزید بہتری کی گنجائش موجود ہے: ڈپٹی کمشنر چمن

چمن( بلو چستان خبر)ڈپٹی کمشنر آفس چمن میں اسپیکر بلوچستان اسمبلی کیپٹن ریٹائرڈ عبدالخالق اچکزئی کی زیر صدارت ضلع میں امن و امان کی مجموعی صورتحال کا جائزہ لینے کے لیے اہم اجلاس منعقد ہوا۔اجلاس میں ڈپٹی کمشنر چمن حبیب احمد بنگلزئی نے شرکا کو پولیس اور دیگر قانون نافذ کرنے والے اداروں کی کارکردگی اور سیکیورٹی انتظامات پر تفصیلی بریفنگ دی۔ انہوں نے بتایا کہ چمن سرحدی اور جغرافیائی لحاظ سے اہم ضلع ہے، جہاں امن و امان برقرار رکھنے کے لیے چوبیس گھنٹے الرٹ رہنا پڑتا ہے۔انہوں نے کہا کہ ضلع کے داخلی و خارجی راستوں پر سنیپ چیکنگ، گشت اور اچانک تلاشی کا سلسلہ جاری ہے، جبکہ مشکوک افراد، گاڑیوں اور موٹر سائیکل سواروں کی کڑی نگرانی کی جا رہی ہے۔ قانون نافذ کرنے والے اداروں کے اہلکار پیشہ ورانہ مہارت کے ساتھ مختلف انداز میں خدمات سرانجام دے رہے ہیں۔اس موقع پر اسپیکر بلوچستان اسمبلی نے چمن میں امن و امان کی صورتحال کو مجموعی طور پر تسلی بخش قرار دیتے ہوئے کہا کہ اس میں مزید بہتری کی گنجائش موجود ہے۔ انہوں نے زور دیا کہ عوام کی جان و مال کا تحفظ ضلعی انتظامیہ کی اولین ذمہ داری ہے اور تمام ادارے چمن کو امن کا گہوارہ بنانے کے لیے بھرپور کردار ادا کریں۔