جدید تعمیراتی ٹیکنالوجی سے زلزلہ خطرات کم کیے جا سکتے ہیں، مریم نواز

لاہور ( بلو چستان خبر) وزیر اعلیٰ پنجاب مریم نواز شریف نے کہا ہے کہ جدید تعمیراتی ٹیکنالوجی کے استعمال سے زلزلوں سمیت قدرتی آفات کے خطرات کو مؤثر طور پر کم کیا جا سکتا ہے۔زلزلہ متاثرین کے عالمی دن کے موقع پر اپنے خصوصی پیغام میں انہوں نے پاکستان سمیت دنیا بھر میں قدرتی آفات سے متاثرہ افراد کے ساتھ یکجہتی کا اظہار کیا اور 2005ء کے کشمیر زلزلے کے متاثرین کو خراج عقیدت پیش کیا۔وزیر اعلیٰ پنجاب نے کہا کہ اس سانحے میں جان کی بازی ہارنے والوں کی یادیں آج بھی زندہ ہیں اور حکومت متاثرہ خاندانوں کے غم میں برابر کی شریک ہے۔انہوں نے کہا کہ قدرتی آفات کے اثرات کم کرنے کے لیے مضبوط انفراسٹرکچر، جامع منصوبہ بندی اور عوامی آگاہی انتہائی ضروری ہے۔ ان کے مطابق پاکستان اسکول سیفٹی فریم ورک کے تحت نصاب میں آفات سے متعلق ابواب شامل کرنا ایک مثبت قدم ہے۔مریم نواز شریف نے بتایا کہ حکومت جدید ٹیکنالوجی جیسے جیوگرافک انفارمیشن سسٹمز اور سیٹلائٹ ماڈلنگ میں سرمایہ کاری کر رہی ہے تاکہ آفات سے بروقت نمٹنے کی صلاحیت بہتر بنائی جا سکے۔انہوں نے مزید کہا کہ پنجاب حکومت نے قدرتی آفات سے بچاؤ اور بحالی کے لیے مؤثر اقدامات کیے ہیں، جبکہ حالیہ سیلاب کے دوران ریکارڈ وقت میں امدادی و بحالی سرگرمیاں مکمل کر کے عوام میں تحفظ کا احساس پیدا کیا گیا۔