اورکزئی میں طوفانی بارشیں، سیلابی ریلوں سے درجنوں دکانیں اور مکانات متاثر

پشاور( بلو چستان خبر) خیبر پختونخوا کے ضلع اورکزئی میں حالیہ بارشوں کے دوران شدید تباہی دیکھنے میں آئی ہے، جہاں مشتی میلہ کے مقام پر موسلادھار بارش کے بعد آنے والے سیلابی ریلوں نے درجنوں دکانوں اور رہائشی مکانات کو اپنی لپیٹ میں لے لیا۔سیلابی پانی کے باعث متعدد گاڑیاں اور موٹر سائیکلیں بھی بہاؤ کی زد میں آ گئیں، جبکہ کئی علاقے شدید متاثر ہوئے۔دوسری جانب لاہور سمیت پنجاب کے مختلف علاقوں میں بھی صبح کے وقت بارش ہوئی جس کے باعث نشیبی علاقے زیر آب آگئے اور شہریوں کو مشکلات کا سامنا کرنا پڑا۔محکمہ موسمیات کے مطابق صوبے کے بیشتر اضلاع میں موسم خشک رہنے کا امکان ہے تاہم چترال، دیر بالائی و زیریں، باجوڑ، سوات، بونیر، مالاکنڈ، شانگلہ اور کوہستان سمیت مختلف اضلاع میں تیز ہواؤں اور گرج چمک کے ساتھ بارش کا امکان ظاہر کیا گیا ہے۔اسی طرح تورغر، بٹگرام، مانسہرہ، ایبٹ آباد، خیبر، مہمند، کرم، اورکزئی اور وزیرستان کے علاقوں میں بھی مطلع جزوی ابر آلود رہنے اور بارش کی پیشگوئی کی گئی ہے۔گزشتہ چوبیس گھنٹوں کے دوران پشاور، نوشہرہ، مردان، کوہاٹ، چترال، سوات، دیر اور کوہستان سمیت مختلف اضلاع میں کہیں کہیں بارش ریکارڈ کی گئی جبکہ میدانی علاقوں میں تیز گرد آلود ہوائیں بھی چلیں۔ پشاور میں ہوا کی زیادہ سے زیادہ رفتار 37 کلومیٹر فی گھنٹہ ریکارڈ کی گئی۔محکمہ موسمیات کے مطابق چراٹ میں 18 ملی میٹر، کالام 11، چترال 9، پشاور میں 4 ملی میٹر تک بارش ریکارڈ کی گئی۔