پاکستان اور چین کے درمیان چانگشا میں تین اہم مفاہمتی یادداشتوں پر دستخط

 اسلام آباد( بلو چستان خبر) چین کے صوبے ہونان کے شہر چانگشا میں پاکستان اور چین کے اداروں کے درمیان تین اہم مفاہمتی یادداشتوں پر دستخط کی تقریب منعقد ہوئی، جس میں صدرِ مملکت آصف علی زرداری نے شرکت کی۔پہلی مفاہمتی یادداشت سندھ کے محکمہ بلدیات اور چینی کمپنی لوشیان انوائرمنٹل ٹیکنالوجی گروپ کے درمیان طے پائی، جس کے تحت کراچی کو پانی کی فراہمی بہتر بنانے کے لیے سمندری پانی کو میٹھا بنانے کے منصوبے پر تعاون کیا جائے گا۔ اس موقع پر سندھ کے سینئر وزیر شرجیل میمن اور چینی کمپنی کے نمائندے نے دستخط کیے۔دوسرا معاہدہ سندھ کے محکمہ بلدیات اور لانگ پن ہائی ٹیک انفارمیشن کمپنی کے درمیان زرعی ٹیکنالوجی کے شعبے میں تعاون کے لیے کیا گیا۔تیسری مفاہمتی یادداشت چائے کی صنعت سے متعلق ہے، جس پر پاکستان کی جانب سے سینیٹر سلیم مانڈوی والا اور چین کی مختلف کمپنیوں کے نمائندوں نے دستخط کیے۔اعلامیے کے مطابق ان معاہدوں کا مقصد مختلف صنعتی شعبوں میں تعاون کو فروغ دینا ہے، جس سے چائے کی صنعت کی ترقی، اقتصادی تعاون اور دونوں ممالک کے درمیان تجارتی و عوامی روابط مزید مضبوط ہوں گے۔