پارہ چنار ایئرپورٹ طویل عرصے بعد دوبارہ فعال، کامیاب فضائی آزمائشی لینڈنگ مکمل

پارہ چنار( بلو چستان خبر) خیبر پختون خوا کے ضلع کرم میں واقع طویل عرصے سے غیر فعال پارہ چنار ایئرپورٹ کو دوبارہ فعال کر دیا گیا ہے۔ذرائع کے مطابق یہ اہم پیش رفت پاک فوج، فرنٹیئر ورکس آرگنائزیشن اور پاکستان ایئرپورٹ اتھارٹی کی مشترکہ کوششوں سے ممکن ہوئی ہے۔ذرائع کا کہنا ہے کہ پاک آرمی ایوی ایشن نے 26 اپریل کو ایئرپورٹ کے رن وے کی آپریشنل تیاری اور فعالیت کو جانچنے کے لیے لینڈنگ اور ٹیک آف کے عملی تجربات کیے۔ان آزمائشی کارروائیوں کے دوران مجموعی طور پر چھ کامیاب لینڈنگ اور ٹیک آف مکمل کیے گئے، جس کے بعد رن وے کو پیشہ ورانہ معیار اور اعلیٰ حفاظتی تقاضوں کے مطابق قرار دیا گیا۔حکام کے مطابق ایئرپورٹ کی بحالی سے علاقے میں فضائی رابطوں کی بہتری اور سفری سہولتوں میں نمایاں اضافہ متوقع ہے۔