بانی پی ٹی آئی کا نظریہ قید نہیں کیا جا سکتا، سہیل آفریدی

پشاور( بلو چستان خبر) وزیر اعلیٰ خیبرپختونخوا سہیل آفریدی نے کہا ہے کہ بانی پاکستان تحریک انصاف بلاوجہ جیل میں ہیں تاہم ان کا نظریہ قید نہیں کیا جا سکتا۔سینیٹر آف ایکسیلنس کی افتتاحی تقریب سے خطاب کرتے ہوئے انہوں نے کہا کہ بانی پی ٹی آئی کی بینائی 85 فیصد تک متاثر ہو چکی ہے جبکہ انہیں اپنی قانونی ٹیم اور اہل خانہ سے ملاقات کی اجازت بھی نہیں دی جا رہی۔وزیر اعلیٰ نے کہا کہ خیبرپختونخوا حکومت بانی کے نظریے کو عملی شکل دینے کے لیے کام کر رہی ہے اور عوامی فلاح و بہبود پر خرچ کرنا حکومت کی اولین ترجیح ہے۔ ان کے مطابق صوبے کے نوجوانوں کو ہنر مند بنانے کے لیے مختلف اقدامات کیے جا رہے ہیں۔انہوں نے کہا کہ تعلیمی اداروں سے فرسودہ نصاب ختم کیا جا رہا ہے اور نوجوانوں پر سرمایہ کاری حکومت کا بنیادی مشن ہے۔سہیل آفریدی نے مزید کہا کہ خیبرپختونخوا میں کرپشن کی کوئی گنجائش نہیں اور افسران کو واضح ہدایت دی گئی ہے کہ وہ کسی بھی قسم کی سفارش قبول نہ کریں۔