سریاب روڈ فائرنگ کیس: ملزمان کی گرفتاری کے لیے نصیرآباد میں پولیس کے چھاپے

کوئٹہ( بلو چستان خبر) سریاب روڈ سیشن کورٹ کے باہر زمین کے تنازع پر پیش آنے والے تین افراد کے قتل کے واقعے میں نامزد ملزمان کی گرفتاری کے لیے پولیس نے ضلع نصیرآباد کے مختلف علاقوں میں کارروائیاں کی ہیں۔پولیس ذرائع کے مطابق پولیس کی بھاری نفری نے ایف آئی آر میں نامزد اشرف مینگل اور دیگر ملزمان کے گھروں پر چھاپے مارے، تاہم گرفتاریوں سے متعلق مزید تفصیلات سامنے نہیں آ سکیں۔واضح رہے کہ 14 اپریل کو سریاب روڈ سیشن کورٹ کے باہر زمین کے تنازع پر فائرنگ کا واقعہ پیش آیا تھا جس کے نتیجے میں میر جمیل مینگل کے جوان سالہ بیٹے سمیت تین افراد جاں بحق ہو گئے تھے۔واقعے کے بعد بلوچستان حکومت نے اس کیس کی اعلیٰ سطح پر تحقیقات کا فیصلہ کیا ہے تاکہ حقائق سامنے لائے جا سکیں اور ذمہ داروں کو قانون کے کٹہرے میں لایا جا سکے۔