کوئٹہ میں تین راکٹ گرنے کے واقعات، متعدد گھر متاثر اور تین افراد زخمی

کوئٹہ( بلو چستان خبر)صوبائی دارالحکومت کوئٹہ کے مختلف رہائشی علاقوں میں نامعلوم سمت سے داغے گئے تین راکٹ گرنے کے واقعات نے شہریوں میں خوف و ہراس پھیلا دیا۔تفصیلات کے مطابق بدھ کی رات اختر محمد روڈ شانتی نگر، فقیر محمد روڈ عثمانیہ گلی اور میر احمد خان روڈ کے علاقوں میں راکٹ داغے گئے، جن کے نتیجے میں تین راہگیر معمولی زخمی ہو گئے جبکہ متعدد گھروں کو نقصان پہنچا۔پہلا راکٹ شانتی نگر میں ایک گھر کی چھت پر گرا، جس سے چھت میں سوراخ ہو گیا اور سولر سسٹم تباہ ہو گیا، تاہم کوئی جانی نقصان نہیں ہوا۔دوسرا راکٹ فقیر محمد روڈ پر ایک گھر کی چھت اور دیواروں سے ٹکرایا جس سے عمارت کو شدید نقصان پہنچا۔تیسرا راکٹ میر احمد خان روڈ پر ایک گھر کی دیوار سے ٹکرایا، جس کے نتیجے میں دیوار گرنے سے قریبی راستے پر موجود تین افراد معمولی زخمی ہو گئے۔زخمیوں کو فوری طور پر قریبی اسپتال منتقل کر دیا گیا جہاں ان کی حالت خطرے سے باہر بتائی جا رہی ہے۔واقعے کے بعد پولیس، ایف سی اور دیگر سیکیورٹی اداروں نے علاقے کو گھیرے میں لے کر سرچ آپریشن شروع کر دیا ہے۔