متحدہ عرب امارات اور سویڈن کے درمیان تعلقات اور خطے کی صورتحال پر تعاون بڑھانے پر اتفاق

ابوظہبی( مانیٹرنگ ڈیسک) متحدہ عرب امارات کے صدر شیخ محمد بن زاید النہیان اور سویڈن کے وزیر اعظم اولف کرسٹرسن کے درمیان ٹیلیفونک رابطہ ہوا جس میں دوطرفہ تعلقات، باہمی تعاون اور مختلف شعبوں میں شراکت داری کے فروغ پر تبادلہ خیال کیا گیا۔گفتگو کے دوران معیشت، قابل تجدید توانائی، پائیداری، ٹیکنالوجی اور مصنوعی ذہانت جیسے اہم شعبوں میں تعاون بڑھانے کے امکانات پر زور دیا گیا، جنہیں دونوں ممالک اپنی ترقیاتی ترجیحات میں شامل رکھتے ہیں۔دونوں رہنماؤں نے اس عزم کا اظہار کیا کہ امارات اور سویڈن کے تعلقات کو مزید مضبوط بنایا جائے گا اور مشترکہ مفادات کے تحت ترقیاتی شراکت داری کو وسعت دی جائے گی۔ اس بات پر بھی اتفاق کیا گیا کہ مختلف شعبوں میں تعاون نہ صرف دوطرفہ تعلقات کو بہتر بنائے گا بلکہ پائیدار ترقی اور معاشی خوشحالی کے اہداف کے حصول میں بھی مددگار ثابت ہوگا۔ٹیلیفونک گفتگو میں مشرق وسطیٰ کی موجودہ کشیدہ صورتحال بھی زیر بحث آئی، جس میں علاقائی و بین الاقوامی امن و سلامتی پر ممکنہ اثرات کا جائزہ لیا گیا۔دونوں جانب سے بحری راستوں کے تحفظ، توانائی کی رسد اور عالمی معیشت پر پڑنے والے اثرات پر بھی تبادلہ خیال کیا گیا۔ اس موقع پر اس بات پر اتفاق کیا گیا کہ یہ رابطہ صرف دوطرفہ تعلقات تک محدود نہیں بلکہ وسیع تر علاقائی استحکام کے تناظر میں بھی اہمیت رکھتا ہے۔یہ رابطہ ایسے وقت میں ہوا ہے جب عالمی سطح پر سکیورٹی، تجارت، توانائی اور سپلائی چین سے متعلق خدشات میں اضافہ دیکھا جا رہا ہے، جس کے باعث اس نوعیت کے اعلیٰ سطحی سفارتی روابط کو خصوصی اہمیت دی جا رہی ہے۔