متحدہ عرب امارات میں حکومتی ڈھانچے کی بڑی تبدیلی، مصنوعی ذہانت اور ترقیاتی کونسل قائم

دبئی/ابوظہبی ( مانیٹرنگ ڈیسک)متحدہ عرب امارات نے وزارتی ترقیاتی ڈھانچے میں اہم تبدیلی کرتے ہوئے ’’المجلس الوزاری للتنمي‘‘ کا نام تبدیل کر کے ’’المجلس الوزاری للذاء الاصطناعي والتنمي‘‘ رکھ دیا ہے۔الخلیج کے مطابق یہ ہدایت نائب صدر، وزیر اعظم اور دبئی کے حکمران شیخ محمد بن راشد آل مکتوم نے صدر شیخ محمد بن زاید النہیان کے وژن کے مطابق جاری کی، جبکہ نئی کونسل کی سربراہی شیخ منصور بن زاید النہیان کریں گے۔رپورٹ کے مطابق یہ فیصلہ نئے حکومتی ورک ماڈل کا حصہ ہے جس کا مقصد آئندہ دو برس میں متحدہ عرب امارات کے پچاس فیصد سرکاری شعبوں، خدمات اور آپریشنز کو مصنوعی ذہانت پر مبنی خودکار نظام کے ذریعے چلانا ہے۔اس اقدام کا بنیادی ہدف حکومتی کارکردگی، پالیسی سازی، جدت، لچک اور خدمات کی فراہمی کی رفتار کو بہتر بنانا ہے، جبکہ انسانی کردار کو مرکزی حیثیت برقرار رکھی گئی ہے۔نئی کونسل وزارتوں اور وفاقی اداروں کی پالیسیوں، قومی ترجیحات اور حکومتی منصوبوں پر عملدرآمد کی نگرانی کرے گی، اور قانون سازی و حکمت عملیوں کا جائزہ لے کر کابینہ کو سفارشات پیش کرے گی۔مزید بتایا گیا ہے کہ یہ ادارہ صحت، تعلیم، رہائش، بنیادی ڈھانچے، نقل و حمل، توانائی اور مواصلات جیسے اہم شعبوں میں مصنوعی ذہانت کے استعمال کو فروغ دے گا تاکہ سرکاری خدمات کو زیادہ تیز، مؤثر اور جدید بنایا جا سکے۔