امریکا کے ایران کشیدگی پر 25 ارب ڈالر اخراجات کا انکشاف، پینٹاگون نے پہلا سرکاری تخمینہ جاری کر دیا

 واشنگٹن( مانیٹرنگ ڈیسک) پینٹاگون کے ایک سینئر اہلکار نے انکشاف کیا ہے کہ امریکا ایران سے متعلق جنگی سرگرمیوں پر اب تک 25 ارب ڈالر خرچ کر چکا ہے۔میڈیا رپورٹس کے مطابق پینٹاگون نے ایران سے جاری کشیدگی اور فوجی آپریشنز کے حوالے سے امریکی اخراجات کا پہلا سرکاری تخمینہ پیش کیا ہے۔کومپٹرولر کے فرائض انجام دینے والے جولس ہرسٹ نے ہاؤس آرمڈ سروسز کمیٹی کے ارکان کو بتایا کہ اس رقم کا زیادہ حصہ اسلحہ سازی اور فوجی تیاریوں پر صرف ہوا ہے۔تاہم انہوں نے واضح تفصیلات فراہم نہیں کیں کہ اس تخمینے میں کن اخراجات کو شامل کیا گیا ہے اور آیا اس میں مشرق وسطیٰ میں ہونے والے تنازعات سے متاثرہ انفراسٹرکچر کی مرمت یا تعمیر نو کے ممکنہ اخراجات بھی شامل ہیں یا نہیں۔کمیٹی کے سینئر ڈیموکریٹ رکن ایڈم اسمتھ نے اس پیش رفت کو اہم قرار دیتے ہوئے کہا کہ یہ پہلا موقع ہے کہ حکومت کی جانب سے اس نوعیت کا کوئی تخمینہ سامنے آیا ہے، جس کا طویل عرصے سے مطالبہ کیا جا رہا تھا۔