آئی ایم ایف کی پاکستان کو صنعتی گیس لیوی میں کمی کی مشروط منظوری، صنعتوں کو ریلیف کا امکان

اسلام آباد( کامرس ڈیسک) بین الاقوامی مالیاتی فنڈ (آئی ایم ایف) نے پاکستان کی جانب سے گیس پر عائد لیوی میں کمی کی تجویز سے مشروط طور پر اتفاق کر لیا ہے، جس کے بعد صنعتی شعبے کے لیے گیس کی قیمتوں میں کمی کی توقع ظاہر کی جا رہی ہے۔ذرائع کے مطابق آئی ایم ایف کی منظوری کے بعد کیپٹو پاور پلانٹس پر لیوی میں 30 سے 60 فیصد تک کمی کا امکان ہے، جس سے صنعتوں کے پیداواری اخراجات میں ریلیف مل سکتا ہے۔مزید بتایا گیا ہے کہ آئی ایم ایف نے وزارت توانائی کی جانب سے تجویز کردہ نئے لیوی فارمولا پر بھی رضامندی ظاہر کی ہے، جس کے تحت اب لیوی کا تعین اوسط بنیاد پر کیا جائے گا، جبکہ اس سے قبل یہ پیک آورز سے منسلک تھی۔ذرائع کے مطابق اس منظوری کے ساتھ شرط عائد کی گئی ہے کہ نیشنل گرڈ سے بجلی کی طلب میں کمی نہیں ہونی چاہیے، اور اگر طلب میں کمی واقع ہوئی تو لیوی دوبارہ بڑھائی جا سکتی ہے۔حکام کے مطابق اس پالیسی کا بنیادی مقصد صنعتی صارفین کو بتدریج قومی بجلی کے نظام (گرڈ) پر منتقل کرنا ہے۔واضح رہے کہ اس وقت کیپٹو پاور پلانٹس پر 1343 روپے فی ایم ایم بی ٹی یو لیوی عائد ہے، جبکہ مہنگی توانائی کے باعث صنعتی شعبہ پہلے ہی دباؤ کا شکار ہے۔