عرفان خان کی گمشدہ فلم 25 سال بعد ریلیز، مداح جذباتی ہو گئے

ممبئی( شو بز ڈیسک)بھارتی سینما کے لیجنڈری اداکار عرفان خان کی ایک نایاب اور طویل عرصے سے گمشدہ فلم ان کے انتقال کے چھ سال بعد ریلیز کر دی گئی ہے، جس نے مداحوں کو حیرت اور جذبات میں مبتلا کر دیا ہے۔بھارتی میڈیا رپورٹس کے مطابق عرفان خان کی چھٹی برسی کے موقع پر ان کی اور اداکارہ ودیا بالن کی پرانی غیر ریلیز شدہ فلم’’دی لاسٹ ٹیننٹ‘‘ کو یوٹیوب پر جاری کیا گیا ہے۔یہ فلم تقریباً 25 برس تک منظرعام سے غائب رہی اور اب پہلی بار ناظرین کے لیے پیش کی گئی ہے۔ ریلیز کے بعد چند ہی دنوں میں اسے دو لاکھ سے زائد بار دیکھا جا چکا ہے، جو شائقین کی دلچسپی اور جذباتی وابستگی کا واضح ثبوت ہے۔یہ فلم 2000 میں محدود وسائل کے ساتھ تیار کی گئی تھی، جس کی ہدایت کاری سارتھک داس گپتا نے کی جبکہ پروڈکشن بھی مشترکہ طور پر انجام دی گئی۔فلم کی کہانی ایک شکستہ دل موسیقار کے گرد گھومتی ہے جو بیرون ملک جانے سے قبل ایک ویران مکان میں پناہ لیتا ہے، جہاں تنہائی اور ماضی کی یادیں ایک علامتی سفر کی شکل اختیار کر لیتی ہیں۔ودیا بالن نے فلم کی ریلیز کو اپنے کیریئر کا جذباتی لمحہ قرار دیتے ہوئے کہا کہ یہ ان کے لیے خاص اہمیت رکھتی ہے کیونکہ یہ ان کی عرفان خان کے ساتھ واحد مشترکہ فلم ہے۔فلم ساز کے مطابق اس پروجیکٹ کی اصل فوٹیج گم ہو جانے کے باعث یہ فلم دہائیوں تک مکمل ہونے کے باوجود ریلیز نہ ہو سکی، اور اب اسے عرفان خان کی یاد میں ایک خراجِ عقیدت کے طور پر پیش کیا گیا ہے۔