کم محنت میں زیادہ فائدہ: نئی تحقیق میں آسان ورزش سے بہتر پٹھوں کی نشوونما کا انکشاف

 اسلام آباد( ہیلتھ ڈیسک)ایڈتھ کاون یونیورسٹی کی ایک نئی تحقیق میں یہ اہم بات سامنے آئی ہے کہ پٹھوں کی طاقت، حجم اور کارکردگی بہتر بنانے کے لیے ضروری نہیں کہ انتہائی سخت یا تھکا دینے والی ورزش کی جائے۔یونیورسٹی کے شعبہ ایکسرسائز اینڈ اسپورٹس سائنس کے ڈائریکٹر پروفیسر کین نوساکا کے مطابق یہ عام تاثر کہ ورزش لازماً مشکل اور تکلیف دہ ہونی چاہیے، بہت سے افراد کو فٹنس کے معمولات سے دور کر دیتا ہے۔انہوں نے کہا کہ اس کے برعکس “ایکسینٹرک ایکسرسائز” پر توجہ دینے سے کم محنت میں بہتر نتائج حاصل کیے جا سکتے ہیں، اور اس کے لیے جم جانا بھی ضروری نہیں ہوتا۔ایکسینٹرک ورزش میں پٹھے اس وقت کام کرتے ہیں جب وہ کھنچ رہے ہوتے ہیں، مثلاً ڈمبل کو آہستگی سے نیچے لانا، سیڑھیاں اترنا یا کرسی پر بیٹھتے ہوئے کنٹرول برقرار رکھنا۔تحقیق کے مطابق اس طریقہ ورزش میں پٹھے زیادہ قوت پیدا کرتے ہیں جبکہ توانائی کا استعمال نسبتاً کم ہوتا ہے، جو اسے روایتی ورزش کے مقابلے میں زیادہ مؤثر بنا دیتا ہے۔