پاکستان اسٹاک ایکسچینج میں شدید مندی، انڈیکس میں ہزاروں پوائنٹس کی کمی

کراچی ( کامرس ڈیسک) کاروباری ہفتے کے آخری روز پاکستان اسٹاک ایکسچینج میں منفی رجحان برقرار رہا اور شدید مندی دیکھنے میں آئی۔کاروبار کے آغاز پر ہنڈرڈ انڈیکس میں 2500 سے زائد پوائنٹس کی کمی ریکارڈ کی گئی جس کے بعد انڈیکس ایک لاکھ 66 ہزار 380 پوائنٹس کی سطح پر آ گیا۔ بعد ازاں پہلے ٹریڈنگ سیشن کے اختتام پر انڈیکس 2172 پوائنٹس کی کمی کے ساتھ ایک لاکھ 67 ہزار پوائنٹس کی سطح پر بند ہوا۔مارکیٹ میں مجموعی طور پر 49 کروڑ حصص کے سودے ہوئے جن کی مالیت 12 ارب 84 کروڑ روپے رہی۔گزشتہ روز بھی مارکیٹ میں نمایاں مندی دیکھی گئی تھی جب انڈیکس 2405 پوائنٹس کی کمی کے بعد ایک لاکھ 69 ہزار 173 پوائنٹس پر بند ہوا تھا۔دوسری جانب ایشیائی اسٹاک مارکیٹس میں ملا جلا رجحان رہا، جاپان اور ملائیشیا میں تیزی جبکہ انڈونیشیا، چین اور ہانگ کانگ کی مارکیٹس میں مندی ریکارڈ کی گئی۔