امریکی کمپنی کی پاکستان کے ایئرپورٹس میں 2.4 ارب ڈالر سیکیورٹی نظام کی پیشکش، واشنگٹن کی حمایت بھی حاصل

اسلام آباد( کامرس ڈیسک) ایک امریکی کمپنی نے پاکستان کے اہم ایئرپورٹس پر جدید سیکیورٹی نظام نصب کرنے کے لیے 2.4 ارب ڈالر کی سرمایہ کاری کی پیشکش کی ہے، جس کی امریکی صدر ڈونلڈ ٹرمپ کی انتظامیہ نے بھی حمایت کی ہے۔سرکاری دستاویزات کے مطابق پاکستان میں امریکی ناظم الامور نتالی بیکر نے کمپنی “سیکیوریپورٹ” کی جانب سے پیش کردہ ایڈوانسڈ پسنجر انفارمیشن اور پسنجر نیم ریکارڈ سسٹم کی تنصیب کی حمایت کی ہے اور پاکستانی حکام پر اس تجویز پر غور کرنے پر زور دیا ہے۔مجوزہ نظام کے تحت ایئرلائنز سے حکومت کو مسافروں کا ڈیٹا محفوظ طریقے سے منتقل کیا جائے گا، جبکہ پاکستان کو ڈیٹا کی مکمل ملکیت اور کنٹرول حاصل رہے گا۔ اس کے ساتھ 24 گھنٹے تکنیکی معاونت اور تربیت بھی فراہم کی جائے گی۔پیشکش کے مطابق اگر پاکستان یہ منصوبہ قبول کرتا ہے تو اس کی تنصیب فاسٹ ٹریک بنیادوں پر ممکن ہو سکے گی۔ پاکستان ایئرپورٹس اتھارٹی کی جانب سے اس نوعیت کے ایک سابقہ منصوبے پر شفافیت سے متعلق سوالات بھی اٹھائے گئے تھے۔تفصیلات کے مطابق کمپنی نے 25 سالہ معاہدے کے تحت 2.4 ارب ڈالر کی سرمایہ کاری کی پیشکش کی ہے اور کہا ہے کہ وہ مسافروں پر عائد سیکیورٹی سرچارج کے ذریعے اپنی لاگت وصول کرے گی۔کمپنی پاکستان میں ایک ذیلی ادارہ قائم کرے گی اور ایک ہزار سے زائد پاکستانیوں کو جدید سیکیورٹی ٹیکنالوجی کی تربیت دے گی۔امریکی ناظم الامور نے اپنی سفارتی مراسلت میں اس منصوبے کو خطے میں سیکیورٹی کے لیے اہم قرار دیتے ہوئے امریکا اور پاکستان کے درمیان تعاون کو سراہا ہے۔ادھر اسلام آباد میں امریکی سفارت خانے کے ترجمان نے کہا ہے کہ وہ نجی سفارتی رابطوں پر تبصرہ نہیں کرتے، تاہم حکومت پاکستان کو اس تجویز پر غور کی سفارش کی گئی ہے۔