بابر اعظم نے مداح کا خواب سچ کر دکھایا، جذباتی مناظر وائرل

لاہور ( سپورٹس ڈیسک) قومی کرکٹ ٹیم کے سابق کپتان بابر اعظم نے اپنے ایک مداح کی دیرینہ خواہش پوری کر کے دل جیت لیے۔سوشل میڈیا پر وائرل ہونے والی ایک ویڈیو میں مداح نے اپنی خواہش کا اظہار کیا تھا کہ وہ اپنے گھر کے لیے بڑی سکرین خریدنا چاہتا ہے تاکہ مستقبل میں اپنے بچوں کے ساتھ بیٹھ کر بابر اعظم کے میچز دیکھ سکے، چاہے وہ پرانے ہی کیوں نہ ہوں۔یہ ویڈیو سامنے آنے پر پشاور زلمی کی انتظامیہ نے مداح کے خواب کو حقیقت میں بدلنے کا فیصلہ کیا اور اس کی بابر اعظم سے خصوصی ملاقات کا اہتمام کیا۔ملاقات کے دوران بابر اعظم نے مداح کو اپنی دستخط شدہ جرسی تحفے میں دی اور اس کے ساتھ بیٹھ کر اپنا ہی میچ دیکھا۔ اس موقع پر انہوں نے مداح کی اہلیہ سے فون پر بھی گفتگو کی، جبکہ ٹیم کی جانب سے مداح کو میچز کی ریکارڈنگ بھی فراہم کی گئی۔خواب پورا ہونے پر مداح جذبات پر قابو نہ رکھ سکا اور اس کی آنکھوں میں خوشی کے آنسو آ گئے۔ اس نے اپنے خواب کو حقیقت بنانے پر پشاور زلمی اور بابر اعظم کا شکریہ ادا کیا۔