فیفا کا افغان خواتین فٹبالرز کو عالمی مقابلوں میں واپسی کا نیا موقع دینے کا فیصلہ

لاہور ( سپورٹس ڈیسک)فیفا نے ایک اہم فیصلہ کرتے ہوئے افغان خواتین فٹبالرز کو بین الاقوامی مقابلوں میں شرکت کا نیا موقع فراہم کر دیا ہے۔اس فیصلے کے تحت وہ افغان کھلاڑی جو طالبان کے اقتدار میں آنے کے بعد ملک چھوڑنے پر مجبور ہو گئی تھیں، اب دوبارہ عالمی سطح پر فٹبال کھیل سکیں گی۔افغانستان کی خواتین قومی ٹیم نے 2021 میں طالبان کے اقتدار سنبھالنے کے بعد سے کوئی باضابطہ بین الاقوامی میچ نہیں کھیلا، کیونکہ اس کے بعد خواتین کی تعلیم، ملازمت اور کھیلوں پر سخت پابندیاں عائد کر دی گئی تھیں۔ان حالات کے باعث کئی باصلاحیت کھلاڑی یا تو جلاوطنی اختیار کرنے پر مجبور ہو گئیں یا پھر کھیل سے کنارہ کش ہو گئیں۔گزشتہ سال منظور ہونے والی فیفا کی نئی حکمتِ عملی کے تحت افغان ویمن یونائیٹڈ ٹیم کا قیام عمل میں آیا، جو بیرون ملک مقیم افغان خواتین کھلاڑیوں کو منظم انداز میں بین الاقوامی سطح پر کھیلنے کا موقع فراہم کر رہی ہے۔