جرمنی سمیت متعدد ممالک کی پاکستان کو فٹبال میں تعاون کی پیشکش، ویمنز فٹبال اور کوچنگ میں بڑی پیش رفت

اسلام آباد( سپورٹس ڈیسک) پاکستان فٹبال کے لیے بین الاقوامی سطح پر اہم پیش رفت سامنے آئی ہے، جہاں جرمنی سمیت متعدد ممالک نے کوچنگ، ویمنز فٹبال اور تربیتی شعبوں میں تعاون کی پیشکش کی ہے۔پاکستان فٹبال فیڈریشن (پی ایف ایف) کے وفد نے کینیڈا میں فیفا کانگریس کے موقع پر مختلف اعلیٰ سطحی ملاقاتیں کیں، جن میں فٹبال کی ترقی سے متعلق اہم امور زیر غور آئے۔پی ایف ایف کے صدر سید محسن گیلانی کی جرمن فٹبال فیڈریشن کے صدر سے ملاقات میں جرمنی نے پاکستان کو کوچنگ ایجوکیشن اور ویمنز فٹبال کے فروغ میں مکمل تعاون کی پیشکش کی۔اس کے علاوہ کینیڈا ساکر کے ساتھ گراس روٹس فٹبال اور کوچنگ کورسز پر تعاون پر بات چیت ہوئی، جبکہ دونوں ممالک کے درمیان نمائشی فٹبال میچز کے انعقاد پر بھی غور کیا گیا۔چینی فٹبال ایسوسی ایشن نے پاکستان کو فٹسال ٹریننگ میں معاونت کی پیشکش کی ہے، اور دونوں ممالک کے کھیلوں کے تعاون کو "آئرن برادرز" قرار دیا گیا ہے۔مزید برآں تاجکستان فٹبال فیڈریشن نے پاکستانی ریفریز اور گول کیپرز کی تربیت میں تعاون کی پیشکش کی، جبکہ ویمنز فٹبال کی ترقی کے لیے بھی مختلف فیڈریشنز کے ساتھ اتفاق رائے سامنے آیا ہے۔