بابر اعظم اور شاہین آفریدی کے بیٹے کا دلکش لمحہ مداحوں کے دل جیت گیا

لاہور ( سپورٹس ڈیسک) پاکستان سپر لیگ کے ایک دلچسپ میچ کے بعد میدان میں ایک خوبصورت منظر نے شائقین کرکٹ کی توجہ اپنی جانب مبذول کر لی۔ قومی ٹیم کے مایہ ناز بلے باز بابر اعظم اور فاسٹ بولر شاہین شاہ آفریدی کے درمیان مقابلے کے بعد ایک یادگار لمحہ دیکھنے میں آیا۔میچ کے دوران شاہین آفریدی کے اہل خانہ بھی اسٹیڈیم میں موجود تھے، جہاں ان کے ننھے بیٹے عالیار اپنے والد کی حوصلہ افزائی کے لیے آئے۔ میچ کے اختتام پر بابر اعظم کو عالیار کے ساتھ خوشگوار انداز میں کھیلتے ہوئے دیکھا گیا۔عالیار نے اپنے والد کی طرح بولنگ کرنے کی کوشش کی اور بابر اعظم کو گیند کروائی، جس پر بابر نے ہلکے پھلکے انداز میں خود کو ایل بی ڈبلیو آؤٹ قرار دے دیا۔ اس دلکش اور معصوم لمحے نے وہاں موجود افراد کے ساتھ ساتھ سوشل میڈیا صارفین کے دل بھی جیت لیے۔ویڈیو وائرل ہونے کے بعد مداحوں نے اس پر محبت بھرے تبصرے کیے اور اس خوبصورت منظر کو کھیل کے مثبت پہلو کی عکاسی قرار دیا۔