ایران کی فیفا ورلڈ کپ دو ہزار چھبیس میں شرکت کی باضابطہ تصدیق

تہران( سپورٹس ڈیسک) ایران نے باضابطہ طور پر فیفا ورلڈ کپ دو ہزار چھبیس میں شرکت کا اعلان کر دیا ہے۔ یہ اعلان ایسے وقت میں سامنے آیا ہے جب ایران اور امریکا کے درمیان کشیدگی میں اضافہ دیکھا جا رہا تھا، تاہم اس فیصلے کے بعد غیر یقینی صورتحال کا خاتمہ ہو گیا ہے۔ایرانی حکومت کے مطابق قومی فٹبال ٹیم عالمی ایونٹ میں شرکت کے لیے مکمل طور پر تیار ہے اور تمام ضروری انتظامات کو حتمی شکل دے دی گئی ہے۔حکومتی ترجمان فاطمہ مہاجرانی نے سرکاری میڈیا سے گفتگو میں بتایا کہ وزارت کھیل و امور نوجوانان نے ٹیم کو بہترین سہولیات فراہم کرنے کے تمام اقدامات مکمل کر لیے ہیں تاکہ کھلاڑی عالمی سطح پر شاندار کارکردگی دکھا سکیں۔اس سے قبل وزیر کھیل سے منسوب بعض بیانات میں شرکت نہ کرنے کا اشارہ دیا گیا تھا، تاہم حالیہ وضاحت کے بعد تمام قیاس آرائیاں ختم ہو گئی ہیں۔دوسری جانب خطے میں جاری کشیدگی اور حالیہ فوجی صورتحال کے باوجود ایرانی حکام نے واضح کیا ہے کہ کھیلوں کی سرگرمیاں سیاسی حالات سے متاثر نہیں ہوں گی۔واضح رہے کہ پاکستان کی ثالثی سے ہونے والی حالیہ جنگ بندی کے بعد خطے میں بہتری کے آثار پیدا ہوئے ہیں جس کے بعد ایران کی شرکت مزید یقینی قرار دی جا رہی ہے۔دوسری جانب ذرائع کے مطابق امریکی صدر ٹرمپ کے نمائندہ خصوصی پاؤلو زمپولی نے فیفا کے صدر گیانی انفانٹینو سے درخواست کی تھی کہ ایران کی جگہ چار بار کی عالمی چیمپئن اٹلی کو ورلڈ کپ میں شامل کیا جائے۔