موٹاپا نوجوانوں میں کینسر کے بڑھتے کیسز کی بڑی وجہ بن سکتا ہے:تحقیق میں انکشاف

 اسلام آباد( ہیلتھ ڈیسک)ایک نئی تحقیق میں یہ بات سامنے آئی ہے کہ موٹاپا 50 سال سے کم عمر افراد میں کینسر کے بڑھتے ہوئے کیسز کی ایک اہم وجہ ہو سکتا ہے۔اگرچہ ماہرین کا کہنا ہے کہ یہ معاملہ ابھی مکمل طور پر واضح نہیں اور مزید تحقیق کی ضرورت ہے، تاہم سائنس دانوں کے مطابق زیادہ وزن یا موٹاپا کینسر کے خطرے میں اضافہ کر سکتا ہے، جس کی ممکنہ وجوہات میں جسم میں انسولین کی بلند سطح اور سوزش شامل ہیں۔حالیہ برسوں میں محققین اس رجحان پر تشویش کا اظہار کر رہے ہیں کہ نوجوان افراد میں کینسر کے کیسز میں تیزی سے اضافہ ہو رہا ہے، جن میں آنتوں اور بیضہ دانی کے کینسر جیسے امراض شامل ہیں۔2023 میں انگلینڈ میں 20 سے 49 سال کی عمر کے افراد میں تقریباً 31 ہزار کینسر کیسز رپورٹ ہوئے، یعنی ہر ہزار افراد میں سے تقریباً ایک شخص متاثر ہوا۔اس کے مقابلے میں 50 سے 79 سال کی عمر کے افراد میں یہ تعداد کہیں زیادہ یعنی 2 لاکھ 44 ہزار تک پہنچ گئی، جو کہ ہر 100 میں سے تقریباً ایک کیس بنتا ہے۔نوجوان عمر کے گروپ میں سب سے زیادہ بریسٹ کینسر کے کیسز رپورٹ ہوئے جن کی تعداد 8500 رہی، جبکہ آنتوں کے کینسر کے 3000 اور جلد کے کینسر (میلانوما) کے 2800 کیسز سامنے آئے۔