پاکستان کو بڑا اعزاز، ڈریپ لیبارٹری کو عالمی ادارہ صحت کی پری کوالیفکیشن مل گئی

اسلام آباد( ہیلتھ ڈیسک) ڈرگ ریگولیٹری اتھارٹی آف پاکستان (ڈریپ) کی سینٹرل ڈرگز لیبارٹری کراچی نے عالمی ادارہ صحت (ڈبلیو ایچ او) کی پری کوالیفکیشن کامیابی سے حاصل کر لی ہے، جسے ملک کے صحت کے نظام میں ایک اہم سنگ میل قرار دیا جا رہا ہے۔وزارت صحت کے ترجمان کے مطابق اس سرٹیفکیشن کے بعد پاکستان میں ادویات کی جانچ کے معیار کو عالمی سطح پر تسلیم شدہ درجہ حاصل ہو گیا ہے۔ اب ڈریپ کی ٹیسٹنگ سروسز عالمی ادارہ صحت کے سخت معیار پر پوری اترتی ہیں، اور یہاں جانچی جانے والی ادویات کو محفوظ، مؤثر اور اعلیٰ معیار کا حامل سمجھا جائے گا۔وفاقی وزیر صحت مصطفیٰ کمال نے اس کامیابی پر ڈریپ اور سینٹرل ڈرگز لیبارٹری کراچی کی تکنیکی ٹیم کو مبارکباد دیتے ہوئے کہا کہ یہ پیش رفت حکومتی صحت اصلاحات میں ایک بنیادی سنگ میل ہے۔انہوں نے کہا کہ حکومت صحت کے نظام کو محض علاج تک محدود رکھنے کے بجائے ایک جامع ہیلتھ کیئر نظام بنانے کے لیے پرعزم ہے، جس میں بیماریوں کی روک تھام اور معیار کو بنیادی اہمیت حاصل ہے۔وزیر صحت کے مطابق قومی لیبارٹریوں میں ادویات کا عالمی معیار کے مطابق تجزیہ شہریوں کی جانوں کے تحفظ کی پہلی دفاعی لائن ہے، اور اس کامیابی سے پاکستانی ادویہ ساز صنعت کو عالمی منڈیوں میں نئی مسابقتی راہیں میسر آئیں گی۔