پشاور زلمی پی ایس ایل تاریخ کی سب سے زیادہ بار فائنل میں پہنچنے والی ٹیم بن گئی

لاہور ( سپورٹس ڈیسک)پاکستان سپر لیگ 2026ء میں پشاور زلمی نے نئی تاریخ رقم کرتے ہوئے ایونٹ کی سب سے زیادہ مرتبہ فائنل تک رسائی حاصل کرنے والی ٹیم کا اعزاز حاصل کر لیا ہے۔کراچی کے نیشنل اسٹیڈیم میں کھیلے گئے پی ایس ایل گیارہ کے کوالیفائر میں پشاور زلمی نے اسلام آباد یونائیٹڈ کو ستر رنز سے شکست دے کر فائنل کے لیے کوالیفائی کر لیا۔یہ پانچواں موقع ہے کہ پشاور زلمی کی ٹیم پی ایس ایل کے فائنل میں پہنچی ہے۔ اس سے قبل یہ ٹیم 2017ء، 2018ء، 2019ء اور 2021ء میں فائنل کھیل چکی ہے، جن میں 2017ء میں وہ ٹائٹل جیتنے میں کامیاب رہی تھی۔اعداد و شمار کے مطابق لاہور قلندرز، کوئٹہ گلیڈی ایٹرز اور ملتان سلطانز چار چار مرتبہ فائنل کھیل چکی ہیں، جبکہ اسلام آباد یونائیٹڈ تین اور کراچی کنگز ایک مرتبہ پی ایس ایل کے فائنل میں جگہ بنا چکی ہے۔