ملک میں ایڈز کے رجسٹرڈ کیسز 84 ہزار تک پہنچ گئے، 61 ہزار زیر علاج، باقی کا سراغ نہ مل سکا

 اسلام آباد( ہیلتھ ڈیسک): ملک میں ایڈز کے رجسٹرڈ کیسز کی تعداد 84 ہزار تک پہنچ گئی ہے جن میں سے 61 ہزار افراد زیر علاج ہیں جبکہ باقی مریضوں کا تاحال سراغ نہیں لگایا جا سکا۔وفاقی وزیر صحت مصطفیٰ کمال نے پریس کانفرنس کے دوران بتایا کہ ایڈز کے 65 ملین ڈالر کے پروگرام میں سے 61 اعشاریہ 1 ملین ڈالر یو این ڈی پی اور ایک غیر سرکاری تنظیم ’’نئی زندگی‘‘ کو جاری کیے گئے ہیں۔انہوں نے کہا کہ سال 2020 میں ملک بھر کے 49 مراکز پر 37 ہزار 944 شہریوں کی اسکریننگ کی گئی، جن میں سے 6 ہزار 910 افراد میں ایچ آئی وی وائرس کی تصدیق ہوئی۔وفاقی وزیر صحت کے مطابق حکومت بیماری کی روک تھام اور متاثرہ افراد کے علاج کے لیے مختلف اقدامات کر رہی ہے، تاہم کیسز کی مؤثر نگرانی اور بروقت تشخیص کو مزید بہتر بنانے کی ضرورت ہے۔