ایچ آئی وی کیسز میں اضافہ، معاملہ پارلیمنٹ پہنچ گیا، فوری اقدامات کا مطالبہ

اسلام آباد( ہیلتھ ڈیسک) ملک کے مختلف علاقوں خصوصاً تونسہ میں ایچ آئی وی کیسز میں تشویشناک اضافے کا معاملہ پارلیمنٹ میں زیرِ بحث آ گیا ہے۔سینیٹر سرمد علی کی جانب سے سینیٹ میں توجہ دلاؤ نوٹس جمع کرایا گیا ہے جس میں ایچ آئی وی کیسز میں اضافے پر وفاقی وزیر صحت سے جواب طلب کیا گیا ہے۔نوٹس میں کہا گیا ہے کہ اسلام آباد سمیت ملک کے مختلف حصوں میں ایچ آئی وی کیسز میں اضافہ پبلک ہیلتھ مینجمنٹ پر سوالیہ نشان ہے اور اس کے پھیلاؤ کو روکنے کے لیے فوری اور مؤثر اقدامات ناگزیر ہیں۔سینیٹر نے قومی ایڈز کنٹرول پروگرام کی کارکردگی کا فوری جائزہ لینے کا بھی مطالبہ کیا ہے۔ نوٹس میں غیر محفوظ طبی طریقوں، مناسب اسکریننگ کی کمی اور آگاہی کے فقدان کو بیماری کے پھیلاؤ کی ممکنہ وجوہات قرار دیا گیا ہے۔مزید کہا گیا ہے کہ محفوظ خون کی منتقلی اور ٹیسٹنگ سہولیات کو بہتر بنانا وقت کی اہم ضرورت ہے، جبکہ عوام میں پھیلنے والی غلط معلومات کو روکنے کے لیے شفاف اور مؤثر آگاہی مہم چلانے پر بھی زور دیا گیا ہے۔نوٹس میں خبردار کیا گیا ہے کہ اگر بروقت اقدامات نہ کیے گئے تو ایچ آئی وی کا پھیلاؤ صحتِ عامہ کے نظام کے لیے سنگین چیلنج بن سکتا ہے۔