شریاس ایئر کی شاندار فارم، پنجاب کنگز پوائنٹس ٹیبل پر سرفہرست

ممبئی ( سپورٹس ڈیسک)انڈین پریمیئر لیگ 2026ء میں پنجاب کنگز کے کپتان شریاس ایئر شاندار فارم میں ہیں اور اپنی ٹیم کو پوائنٹس ٹیبل پر پہلی پوزیشن تک لے آئے ہیں۔ وہ اس سیزن میں اوسطاً ستر رنز اور ایک سو چھاسی کے اسٹرائیک ریٹ سے رنز اسکور کر رہے ہیں۔بھارتی میڈیا کے مطابق شریاس ایئر نے اپنے ایک بیان میں کہا ہے کہ ماضی میں انہیں شارٹ گیند کے خلاف کمزوری پر شدید تنقید کا سامنا رہا، جس نے انہیں اپنی کارکردگی بہتر بنانے پر مجبور کیا۔انہوں نے بتایا کہ ناقدین کی بار بار تنقید نے ان کے عزم کو مزید مضبوط کیا اور اسی دباؤ نے انہیں اپنی تکنیک پر محنت کرنے اور خامیوں پر قابو پانے کی ترغیب دی۔بھارتی میڈیا کے مطابق حال ہی میں شریاس ایئر نے ممبئی کے فاسٹ باؤلر جسپریت بمراہ کے خلاف شاندار چھکا لگا کر ناقدین کو مؤثر جواب دیا۔شریاس ایئر کا کہنا ہے کہ اب وہ شارٹ گیند کے خلاف دفاعی انداز کے بجائے جارحانہ حکمت عملی کے ساتھ کھیلتے ہیں اور اپنی کارکردگی میں تسلسل لانے کی کوشش کر رہے ہیں۔انہوں نے اپنی کامیابی کا سہرا سخت محنت اور ذہنی مضبوطی کو دیتے ہوئے کہا کہ وہ روزانہ طویل پریکٹس کرتے ہیں، سینکڑوں گیندوں کا سامنا کرتے ہیں اور اپنی تکنیک کو مسلسل بہتر بنا رہے ہیں۔