سندھ میں نجی اسکولوں کی فیس وصولی کے نئے قواعد نافذ، محکمہ تعلیم کا سرکلر جاری

 کراچی ( ایجو کیشن ڈیسک)محکمہ تعلیم سندھ نے نجی اسکولوں کے لیے فیس وصولی سے متعلق اہم سرکلر جاری کرتے ہوئے نئے قواعد و ضوابط نافذ کر دیے ہیں۔جاری کردہ سرکلر کے مطابق میٹرک کے طلبہ سے فیس مارچ دو ہزار چھبیس تک وصول کرنے کی ہدایت کی گئی ہے جبکہ اپریل دو ہزار چھبیس میں ہونے والے امتحانات کے طلبہ سے اضافی فیس لینے پر مکمل پابندی عائد کر دی گئی ہے۔نویں جماعت سے دسویں جماعت میں پروموٹ ہونے والے طلبہ کے لیے بھی فیس کا نیا شیڈول جاری کیا گیا ہے جس کے مطابق جون اور جولائی دو ہزار چھبیس کی فیس اپریل اور مئی میں وصول کی جائے گی۔پری پرائمری سے نویں جماعت تک کے طلبہ کے لیے بھی نئی فیس پالیسی نافذ کرنے کا اعلان کیا گیا ہے۔ نجی اسکولوں کو ہدایت کی گئی ہے کہ وہ فیس کے الگ الگ ووچر جاری کریں، جبکہ اپریل سے جون اور مئی سے جولائی کے لیے علیحدہ ووچرز جاری کرنا لازمی قرار دیا گیا ہے۔سرکلر کے مطابق جون کی فیس کا ووچر تیس جون تک اور جولائی کی فیس کا ووچر اکتیس جولائی تک قابل قبول ہوگا۔