اداکارہ میرا کے والد کو دل کا شدید دورہ، تین شریانیں بند، مداحوں سے دعاؤں کی اپیل

لاہور( شو بز ڈیسک)پاکستانی شوبز انڈسٹری کی معروف اداکارہ میرا نے اپنے والد کو دل کا شدید دورہ پڑنے کے بعد اسپتال میں داخل کیے جانے کی تصدیق کرتے ہوئے مداحوں سے ان کی جلد صحت یابی کے لیے دعاؤں کی اپیل کی ہے۔اداکارہ کے مطابق ان کے والد کو ہنگامی طور پر اسپتال منتقل کیا گیا جہاں معائنے کے بعد انکشاف ہوا کہ دل کی تین شریانیں بند ہیں جس کے باعث ان کی حالت تشویشناک قرار دی جا رہی ہے۔ڈاکٹروں کی جانب سے علاج کے لیے مختلف سرجریوں کا مشورہ دیا گیا ہے اور امکان ظاہر کیا جا رہا ہے کہ اگلے ہفتے پہلے مرحلے میں آپریشن کیا جائے گا جبکہ مجموعی طور پر تین سرجریوں کی ضرورت پڑ سکتی ہے۔میرا نے کہا کہ ان کے والد کی صحت ان کے لیے انتہائی اہم ہے اور وہ اس مشکل وقت میں مداحوں کی دعاؤں کی محتاج ہیں۔یہ خبر سامنے آنے کے بعد سوشل میڈیا پر صارفین کی بڑی تعداد نے ان کے والد کی جلد صحت یابی کے لیے نیک خواہشات اور دعاؤں کا اظہار کیا ہے۔واضح رہے کہ اداکارہ میرا ان دنوں اپنی نئی فلم کی تشہیری سرگرمیوں کے باعث بھی خبروں کی زینت بنی ہوئی ہیں۔